ਗੁਰਦਾਸਪੁਰ, 23 ਸਤੰਬਰ 2025 :- ਰਾਵੀ ਦਰਿਆ ‘ਤੇ ਮਕੌੜਾ ਪੱਤਣ ਵਾਲੀ ਥਾਂ ‘ਤੇ ਪੱਕਾ ਪੁਲ ਬਣਾਉਣ ਦੀ ਮੰਗ ਨੂੰ ਲੈ ਕੇ ਭਾਜਪਾ ਆਗੂਆਂ ਨੇ ਜ਼ਿਲ੍ਹਾ ਪ੍ਰਧਾਨ ਬਘੇਲ ਸਿੰਘ ਬਾਹੀਆ ਦੀ ਅਗਵਾਈ ਹੇਠ ਡੀਸੀ ਗੁਰਦਾਸਪੁਰ ਨੂੰ ਇੱਕ ਮੰਗ ਪੱਤਰ ਸੌਂਪਿਆ। ਬਘੇਲ ਸਿੰਘ ਬਾਹੀਆ ਨੇ ਦੱਸਿਆ ਕਿ ਇਸ ਪੁਲ ਨੂੰ ਬਣਾਉਣ ਦੀ ਯੋਜਨਾ ਕੇਂਦਰ ਸਰਕਾਰ ਨੇ 2021 ਵਿੱਚ ਬਣਾਈ ਸੀ ਅਤੇ ਇਸ ਲਈ 10,047.68 ਲੱਖ ਰੁਪਏ ਦਾ ਫੰਡ ਵੀ ਜਾਰੀ ਕੀਤਾ ਸੀ। ਉਨ੍ਹਾਂ ਨੇ ਹੈਰਾਨੀ ਪ੍ਰਗਟ ਕਰਦਿਆਂ ਕਿਹਾ ਕਿ ਦੋ ਸਾਲ ਬੀਤ ਜਾਣ ਦੇ ਬਾਵਜੂਦ ਵੀ ਪੰਜਾਬ ਸਰਕਾਰ ਨੇ ਇਸ ਪੁਲ ਦਾ ਨਿਰਮਾਣ ਸ਼ੁਰੂ ਨਹੀਂ ਕੀਤਾ ਹੈ।
ਉਨ੍ਹਾਂ ਕਿਹਾ ਕਿ ਪਿਛਲੇ ਦਿਨੀਂ ਆਏ ਭਾਰੀ ਮੀਂਹ ਅਤੇ ਹੜ੍ਹਾਂ ਕਾਰਨ ਜ਼ਿਲ੍ਹੇ ਦੇ ਸੱਤ ਅਤੇ ਪਠਾਨਕੋਟ ਦੇ ਚਾਰ ਪਿੰਡਾਂ ਦਾ ਸੰਪਰਕ ਕਰੀਬ 6-7 ਦਿਨਾਂ ਤੱਕ ਆਪਣੇ ਜ਼ਿਲ੍ਹਿਆਂ ਤੋਂ ਟੁੱਟਿਆ ਰਿਹਾ ਸੀ। ਜੇਕਰ ਇਸ ਪੁਲ ਦਾ ਨਿਰਮਾਣ ਸਮੇਂ ਸਿਰ ਹੋ ਜਾਂਦਾ, ਤਾਂ ਲੋਕਾਂ ਨੂੰ ਇੰਨੀ ਮੁਸ਼ਕਲ ਦਾ ਸਾਹਮਣਾ ਨਾ ਕਰਨਾ ਪੈਂਦਾ। ਇਸ ਲਈ, ਉਨ੍ਹਾਂ ਨੇ ਮੰਗ ਕੀਤੀ ਕਿ ਪੁਲ ਦਾ ਕੰਮ ਬਿਨਾਂ ਕਿਸੇ ਦੇਰੀ ਦੇ ਤੁਰੰਤ ਸ਼ੁਰੂ ਕੀਤਾ ਜਾਵੇ ਤਾਂ ਜੋ ਲੋਕਾਂ ਨੂੰ ਲਾਭ ਮਿਲ ਸਕੇ।
ਬਾਹੀਆ ਨੇ ਚੇਤਾਵਨੀ ਦਿੱਤੀ ਕਿ ਜੇਕਰ ਪੁਲ ਦੇ ਨਿਰਮਾਣ ਵੱਲ ਧਿਆਨ ਨਾ ਦਿੱਤਾ ਗਿਆ, ਤਾਂ ਭਾਜਪਾ ਇਸ ਦੇ ਖ਼ਿਲਾਫ਼ ਸੰਘਰਸ਼ ਸ਼ੁਰੂ ਕਰੇਗੀ ਅਤੇ ਪੁਲ ਬਣਾਉਣ ਲਈ ਹਰ ਜ਼ਰੂਰੀ ਕਦਮ ਚੁੱਕਿਆ ਜਾਵੇਗਾ।
ਇਸ ਮੌਕੇ ‘ਤੇ ਭਾਜਪਾ ਆਗੂ ਸੂਰਜ ਭਾਰਦਵਾਜ, ਰੇਣੂ ਕਸ਼ਯਪ, ਰਵੀ ਕਰਨ ਸਿੰਘ, ਸ਼ਿਵਬੀਰ ਸਿੰਘ ਰਾਜਨ, ਅਸ਼ੋਕ ਵੈਦ, ਵਿਕਾਸ ਗੁਪਤਾ, ਗੁਰਮੀਤ ਕੌਰ, ਬਿੰਦੀਆ, ਰਣਬੀਰ ਸਿੰਘ, ਰਿੱਕੀ ਮਹਾਜਨ, ਰਜਿੰਦਰ ਬਿੱਟਾ, ਜੋਗਿੰਦਰ ਸਿੰਘ, ਵਿਨੈ ਚੌਧਰੀ, ਬਿੱਟੂ ਮਕੌੜਾ, ਨਿਰਮਲ ਸਿੰਘ, ਰਾਕੇਸ਼ ਮਹਾਜਨ, ਰਾਹੁਲ ਹਰਚੰਦ ਸਮੇਤ ਹੋਰ ਆਗੂ ਹਾਜ਼ਰ ਸਨ।
