ਚੋਣ ਨਤੀਜਿਆਂ ਤੋਂ ਬਾਅਦ ਸ਼ੇਅਰ ਬਾਜ਼ਾਰ ’ਚ ਜ਼ਬਰਦਸਤ ਉਛਾਲ

ਮੁੰਬਈ

ਤਿੰਨ ਰਾਜਾਂ ਦੀਆਂ ਵਿਧਾਨ ਸਭਾ ਚੋਣਾਂ ਵਿਚ ਭਾਜਪਾ ਦੀ ਜਿੱਤ ਨੇ ਅੱਜ ਨਿਵੇਸ਼ਕਾਂ ਦਾ ਹੌਸਲਾ ਵਧਾਇਆ ਤੇ ਘਰੇਲੂ ਸ਼ੇਅਰ ਬਾਜ਼ਾਰਾਂ ਵਿਚ ਸੋਮਵਾਰ ਨੂੰ ਲਗਾਤਾਰ ਪੰਜਵੇਂ ਕਾਰੋਬਾਰੀ ਸੈਸ਼ਨ ਵਿਚ ਤੇਜ਼ੀ ਦਰਜ ਕੀਤੀ ਗਈ। ਸੈਂਸੈਕਸ ਤੇ ਨਿਫਟੀ ਅੱਜ 2 ਫੀਸਦੀ ਤੱਕ ਚੜ੍ਹ ਕੇ ਰਿਕਾਰਡ ਪੱਧਰ ਉਤੇ ਬੰਦ ਹੋਏ। ਬੀਐੱਸਈ ਸੈਂਸੈਕਸ ਨੇ ਅੱਜ 1383.93 ਅੰਕਾਂ ਦੀ ਜ਼ਬਰਦਸਤ ਛਾਲ ਮਾਰੀ ਜੋ ਕਿ 2.05 ਪ੍ਰਤੀਸ਼ਤ ਦਾ ਵਾਧਾ ਹੈ। ਇਹ ਹੁਣ ਤੱਕ ਦੇ ਸਭ ਤੋਂ ਉੱਚੇ ਪੱਧਰ 68,865.12 ਉਤੇ ਬੰਦ ਹੋਇਆ। ਬੀਐੱਸਈ ’ਚ ਸੂਚੀਬੱਧ ਕੰਪਨੀਆਂ ਦਾ ਕੁੱਲ ਮਾਰਕੀਟ ਪੂੰਜੀਕਰਨ ਇਸ ਦੌਰਾਨ 5.81 ਲੱਖ ਕਰੋੜ ਰੁਪਏ ਵਧ ਕੇ 343.48 ਲੱਖ ਕਰੋੜ ਰੁਪਏ ਹੋ ਗਿਆ। ਇਸੇ ਦੌਰਾਨ ਐੱਨਐੱਸਈ ਨਿਫਟੀ ਵੀ ਹੁਣ ਤੱਕ ਦੇ ਸਭ ਤੋਂ ਉੱਚੇ ਪੱਧਰ ਉਤੇ ਪਹੁੰਚ ਗਿਆ।